På innsida av krafta - frå ord til handling

Korleis får Noreg meir kraft – raskare – utan å miste lokal legitimitet på vegen?

Etter konferansen «På innsida av krafta» i Suldal samlar me no sentrale aktørar til eit rundebord under Arendalsuka.

Bakgrunnen er enkel:
Noreg treng meir kraft, meir effekt og meir nett. Samtidig aukar konfliktane, naturpresset og motstanden mot nye inngrep. Mange prosjekt stoppar ikkje fordi behovet manglar, men fordi tilliten, prosessane og samfunnskontrakten ikkje heng med i den nye effektalderen.

Gjennom konferansen i Suldal vart det tydeleg at utfordringa ikkje berre handlar om teknologi og produksjon. Ho handlar òg om gjennomføringsevne, rolleforståing, lokal verdiskaping og legitimitet.

Arbeidet er samla i «Suldalerklæringa» – eit dokument som løftar fram konkrete forslag til korleis kraftprosjekt kan få betre prosessar, sterkare lokal forankring og raskare framdrift.

Under Arendalsuka tek me diskusjonen vidare:
Kva må faktisk endrast no?
Kven må ta ansvar?
Og korleis går me frå analyse og gode intensjonar til handling?

Arrangementet samlar sentrale stemmer frå vertskommunar, industri, kraftbransje og energisystemet til ein konkret og framoverretta samtale om kva som må til for å få meir kraft med større legitimitet i åra som kjem.

Vertskap er Suldal kommune i samarbeid med Energihovudstaden og sentrale samarbeidspartnarar frå kraft- og energibransjen. Arrangementet er planlagt gjennomført om bord på Ryger Elektra.