Kvifor skal vi grunnlovsfeste norsk språk? Språkpolitisk verkstad med Nynorsk forum

Velkomen til årets språkpolitiske verkstad med Nynorsk forum! Her skal vi drøfte grunnlovsframlegg 4 (2023-2024) om grunnlovsfesting av statusen til det norske språket, medrekna jamstillinga mellom nynorsk og bokmål.

Kva skal vi med grunnlovsfesting av språket? Kor vanleg er dette i andre land? Kvifor er dette ei så viktig sak for målrørsla, og kva er motivasjonen til politikarane bak framlegget?

Grunnlovsframlegget som kom i førre periode skal no til reell handsaming i stortinget. Vi inviterer både involverte politikarar og andre med meiningar om saka til debatt. Før debatten kjem der ei innleiing frå Martin Kolberg, tidlegare stortingsrepresentant og partisekretær for Arbeidarpartiet.

Nynorsk forum er eit samarbeidsorgan for nynorske institusjonar, organisasjonar og bedrifter. Forumet drøftar viktige spørsmål om nynorsk i kulturlivet og samfunnet, og kjem med felles prioriteringar til statsbudsjettet kvart år.