Stolar du på maskinen? Publikum, AI og tillitskrisa i journalistikken

Kunstig intelligens endrar korleis vi får nyhende, kven som produserer det — og kva vi vel å tru på. Når algoritmar bestemmer kva vi ser, og språkmodellar skriv tekstar som liknar journalistikk, kva skjer då med tilliten som demokratiet er avhengig av?

OsloMet inviterer til debatt med forskarar og praktikarar som arbeider i skjeringspunktet mellom KI, medieteknologi og journalistikk. Gustavo Mello leier OsloMet AI Lab og forskar på korleis intelligente system påverkar samfunnet. Laurence Habib er dekan ved Fakultet for teknologi, kunst og design og har i fleire år arbeidd med spørsmålet om korleis teknologi formar læring, tillit og demokratisk deltaking. Roy Krøvel er professor i journalistikk og leier AI Journalism Resource Center — der forskarar og journalistar saman utforskar korleis KI kan styrkje eller svekkje den kritiske pressa. Joakim Lie er prosjektleiar i Fritt Ord, der han arbeider med spørsmål om korleis teknologien verkar inn på den offentlege samtalen. Han har og leia prosjekt knytte til unge og ytringsfridom. Som medredaktør av antologien "KI og veien videre for mediene" har han vore med på å løfte fram røystene til journalistar og fagfolk som møter kunstig intelligens i arbeidet sitt. Pål Nedregotten er teknologi- og produktdirektør i NRK og sit i toppleiinga og redaktørkollegiet til allmennkringkastaren. Som ansvarleg for sikkerheitsorganisasjonen i NRK og leiar av KI-rådet i NRK, står Nedregotten sentralt i arbeidet med å forstå og møte trusselen frå KI-generert desinformasjon, svindelforsøk og djupe forfalskingar (deepfakes). Han er ei markant røyst i debatten om korleis redaktørstyrte medium kan bevare rolla som garantist for sanning og tillit i ei tid der teknologien utfordrar evna publikum har til å skilje mellom ekte og maskingenerert informasjon. Nedregotten kom til NRK i 2023 etter 18 år i Amedia, og har i ei årrekkje vore ein leiande strateg innan digital medieutvikling, personalisering og datastrategi, mellom anna som styreleiar i Mediebedriftenes Landsforening.
Ludvig Lilleby Johansson er grunnleggar og leiar i Tryggere KI, ein ideell organisasjon som arbeider med folkeopplysning og politisk rådgiving for trygg utvikling av kunstig intelligens. Med bakgrunn som ingeniør og AI-rådgivar har han bygd og innført AI-system i norsk offentleg sektor, mellom anna for UDI og Helsedirektoratet, og kombinerer teknisk innsikt med eit tydeleg engasjement for tillit og samfunnsansvar.

Saman spør vi: Stolar du på maskinen?